الحمالي وهب

 *الحمالي وهب .. و المجربات* *المستطوع بعد غياب طويل:* وهب .. مابرحت تشتغل حمالي؟؟  *وهب:* ايه .. و الله مثل ما تشوف. *المستطوع:* و شغل التحميل يكفي مع هالغلاء؟  *وهب:* اذا عندك شغلة احسن و اقدر اسويها، .. جيبها *المستطوع:* عندي لك ذكر مجرب لزيادة الرزق.. جربه و بتشوف الرزق يجيك من كل صوب..  *وهب:*  الحمد لله مداومين على ذكر الله في الصلاة و الدعاء و التسبيح.. و تلاوة القرآن.   *المستطوع:* لا.. يا وهب، هذا ذكر مخصوص حق زيادة الرزق، اقول لك مجرب.  *وهب:* ما فهمت اشلون مجرب.. اليس الله فعال لما يريد، و له الأمر و النهي؟ .. يعني مافي شيء مجرب يصلح حق كل الناس مع الخالق عز وجل..  المعروف أن الله لا يرد من سأله اما بالاستجابة الفورية، أو المؤجلة  أو يستبدله بأمر آخر أفضل مما سأل، أو تكون على شكل ثواب في الآخرة.  *المستطوع:* يظهر انك يا وهب ماتعرف المجربات..  *وهب:* اشلون يعني مجربات.. قصدك *نفعت مع الله ؟!!* و أن ذلك الذكر اقوى من إرادة الله ؟!! ..اهوه استغفر الله بس.

 *الحمالي وهب.. رؤية الهلال و التكنولوجيا* في الديوانية  *وهب:* الحين ثبت الشهر باجر لو لا، ترى تخربطنا. *مدعي الحداثة:* العلم تطور و صار هناك أقمار صناعية، و تلسكوب، و انتوا بعدكم على شافوه و لا ما شافوه، قعدوا على تخلفكم.  *المستطوع:* هذا دين مو لعب .. عصر النص ماكان فيه نت و لا هالتكنولوحيا اللي صنعها الكفار.. و لا يوجد نص يجعلنا نقبل استعمال هالتكونوجيا في ثبوت الهلال. *وهب:* اجل على اي اساس بتصوم باجر؟  *المستطوع:* على مبنى وحدة الأفق، لأنهم شافوا الهلال و بأعينهم في بلاد الواق واق، و حضر الشهود الثقاة عند شيخ فلان. *وهب:* و اشلون عرفتوا ان الهلال ثبت في ذيك الديرة البعيدة. *المستطوع:* بالجوال، و بشبكات التواصل الاجتماعية.. الحين العالم تطور و كلشي ينعرف في نفس الوقت.   *وهب:* و هل  عندكم نص يجيز استعمال التكنولوجيا لمعرفة وحدة الأفق.. و الهلال اللي طلع في آخر الدنيا..؟؟؟  و يحرم استعمال تكنولوجيا ثانية لمعرفة ثبوت الهلال في ديرتكم ؟؟  *المستطوع:*  *هاه...؟؟!! ... لا*.. *اشلون؟؟؟ ما ادري و الله*

 *الحمالي وهب .. بين الظواهر و التقول على الله* لمستطوع شاف الحمالي وهب يدفع العربانه و فيها اغراض مدعي الحداثة  *المستطوع:* جز يا وهب عن المنحرفين، و لا تجالسهم و لا تحمل لهم. وهب:  ليش .. اشصاير  *المستطوع:*  في كرامة صايرة جدامهم، لكن الله عامي قلوبهم. *وهب:* كرامة؟ ... و ينها  *المستطوع:* هؤلاء المنحرفين، كانوا ضد النقاب، فإبتلاهم الله بالكورونا و خلاهم حتى هم يلبسون النقاب (الكمامة) و مو بس الحريم.😷 *مدعي الحداثة:*  ما اقول الا، الله يخلف على عقولكم.. يعني هذه كرامة *لبس النقاب* 😀 😃 *وهب:* و اذا انتهى هذا المرض،  و نزع الرجال و الحريم كماماتهم، و صارت الحريم تمشي بدون نقاب .. بتصير ذي كرامة *نزع النقاب* و لا شلون⁉️ 🤔 https://swalefwahab.blogspot.com/2021/04/blog-post.html

 *الحمالي وهب ...بين التباهي و الإستغلال*  *الابن:* يبه..الحين صج كانت عندنا مزرعة ؟  *وهب:* ايه ...چان عندنا نتيفة نخل ورثته من جدك الله يرحمه. *الولد:* و الحين وينه ؟  *وهب:* راح في الفشخرة و الزباوه  ... تصدق، اني بعت النخل و اشتريت بثمنه فيديو  ..  *الولد:* يبه ذا شيء ما ينتصدق ...جهاز بقيمة نخل، اشلون؟؟  *وهب:*  اقول لك اشلون، ... قبل 30 سنة طلع جهاز اسمه فيديو،  اللي يخلينا  نشتري الافلام ونطالعها  على التلفزيون..و كان شيء حيل جديد  ... و عشان اتزيبه جدام الناس و اهل امك  ...بعت نخلنا  بعشرة آلاف ريال، و اشتريت ذا الفيديو  اللي كان  بسبعة آلاف ذيك الحين و اشتريت بعد  5 أشرطة افلام بألف ريال، و بالأفين الباقية شريت نملية حق الفديو و التلفزيون.... و طارت قيمة النخل. *الولد:* معقول ... تبيع نخل عشان ذاك الجهاز؟  *وهب:* اللي مو معقول ان الناس ما برحت تكرر نفس الشيء و نفس الغلط..  *الولد:*  ترى يبه... ما احد سوى سواكم، و لا بكل واحد عنده نخل.. *وهب:* نفس السوايا تسونها مابرحتوا لكن ...

 *الحمالي وهب .. بين النص و معطيات الواقع*  *المتفلسف:*  وهب .. ما اشوف عندك غرشة ماي معلقها في عربانتك في عز هالصيف و الحر؟    شرب الماي مهم للحفاظ على صحة الكلى. *فنط المستطوع قائلا:*  ما عليك منه، ياوهب  .. هناك روايات كثيرة تحث على  التقليل من شرب الماي .. *المتفلسف:*  تبينه نترك  كلام الدكاترة و المختصين، و نسمع كلام المطاوعة ؟! .. كثرة شرب الماي مفيدة للصحة والكلى..  *المستطوع:*  ما عليك منهم ياوهب  .. هذه روايات شريفة، و عليك اتباعها   *وهب:*  هي روايات .. ويمكن تكون ضعيفة..  احد فيكم تثبت من صحتها؟ *المستطوع:*  حتى انت يا وهب اختربت و صرت تسمع كلام المنحرفين؟  *وهب:*  و هل التقليل من شرب الماء واجب؟  *المتفلسف:*  لا ... ما احد قال  .. هي في حكم المستحبات.   *وهب:* اجل تركها جايز .. *المتفلسف:*  احسنت يا وهب، الان بدأت تصير واعي.. و لا تنس بعد أن الملوثات و الكيماويات في هذا الزمان أكثر من السابق.. زماننا مختلف و علينا أن نعي ذلك. *المستطوع:*  ما ...

 *الحمالي وهب .. الأديان، المذاهب  و العنصرية* *المتفلسف:* اشوفكم طايرين في السماء بسبب زيارة البابا، ترى  هو مو جاي عشان يزور مرجعكم..  *وهب:* أجل جاي يزورك انت و يا قروبك؟! *المتفلسف:* لا .. جاي يزوركم انتوا (الناس)، عشان أنتوا أصلا كنتم مسيحيين. *وهب:* هل كيف؟! .. ما فهمت.. احنا مسلمين ابا عن جد. *المتفلسف:* الموضوع و مافية انكم مسيحيين الأصل قبل لا تصيرون مسلمين، و البابا جاي يزوركم لهذا السبب.  *وهب:* عجيب .. لا يكون بس انتوا فاهمين : ان لكل دين أو مذهب، يخلق الله أوادم جديدة مخصوصين بذاك الدين أو المذهب.

  *وهب:*  العيال احجزوا ليه موعد عشان التطعيم  *المتفلسف:*  لا .. يا وهب لا تطعم .. يقولون ان الفيروس تحور و تغير  *وهب:*  عيالي دارسين و متعلمين.. و يقولون ان التطعيم واجب   *المتفلسف:* من خلال قراآتي على السوشيال ميديا مثل الواتساب و الانستجرام ..و غيرها،   هذا الفيروس تغير و طلع منه نوع مختلف في بلاد الغرب .. و يمكن اللي سووا التطعيم مايدرون ان هالفيروس بيتغير.  *وهب:*  تقول بنتي .. ان اللي سووا التطعيم دارسين هالفيروس زين مازين.. و سووا التطعيم معتمدين على اجزاء ثابتة و مستقرة في هالفيروس مو الاجزاء المتغيرة.. ذه شغل دكاترة مختصين على مستوى العالم، و  منظمات دولية و شركات كبيرة و عارفين شغلهم زين.  *المتفلسف:* عجيييب.. يعني عندهم معرفة و يدرون ..تصدق عاد،  توني ادري الحين منك يا وهب *وهب:*  لا يكون حسبالك أنت وربعك عباقرة سوالف الواتساب، و السناب شات،  اللي بتنبهونهم و تعلمونهم و انتوا قاعدين و منطعجين.