التباهي بالماديات

 *الحمالي وهب.. و التباهي بالماديات*   

المتفلسف برفقة ابنه  في المستشفى

*المتفلسف:*

و الله اني ابتليت بأمراض الضغط و السكر ..متى بس الله يفكني منها .. 

*الولد* 

يبه.. عاد انتو ما رحمتوا روحكم في النهار مجابيس و في الليل وجبات سريعة و مطاعم .. و لا تأكلون؛ لا خضروات و لا فواكه ... و لا حركة و لا رياضة؛ كل مكان تروحونه  بالسيارة.

*المتفلسف:*

الحمد لله و ضايفنا مريحة، و رواتبنا زينة بعد، و عندنا سيارات.. ليش ما ناكل، و ليش تبي لنا  التعب.

*و أثناء الحوار.. و اذا بوهب  يدخل المستشفى فقال المتفلسف لإبنه:*

تصدق ان الحمالي  وهب الحمالي؛ كان زميل معانا في المدرسة لكنه ما كمل دارسة و الحين يشتغل حمالي في سوق الخضرة ..  اكيد دقه المرض دق بسبب الفقر و التعب ..  

*الولد:* 

باين عليه ما فيه شيء ... تلقى حياته صحية أكثر مننا.. يأكل خضروات و فواكه و يتعشى خفيف ..روب ولا صالونه... و غير شغل التحميل؛ رياضة يومية. 

*المتفلسف* 

يوه عاد  ... سويت حياة الحمالي احسن من حياتنا.. خل نسألة الحين وتشوف.

*المتفلسف*

وهب ... سلامات جاي المستشفى اليوم... ضغط و لا سكر 

*وهب*

الله يسلمك ..لا ذا، و لا ذاك 

*المتفلسف*

هاه.. لا يكون بس شيء ازيد ؟ 

ماعليه العلاجات تطورت و إن شاء الله تلقى علاج و تتحسن.

*وهب*

لا... الحمد لله ما فيني شيء 

*المتفلسف*

 اجل المريض أحد من العيال ؟

*وهب*

لا ... العيال كلهم بخير .. و الحمد لله.

*المتفلسف:*

ها.. اجل اشحقه جاي المستشفى؟

*وهب:*

ايه ... و الله جاي اسوي فحص ما قبل الزواج ... عشان زواجي الثاني..  و هذا انت عرفت من الحين، لا يكون ما تحضر العرس.